ఏపీలో మరో కొత్త ఎయిర్‌పోర్టుకు ఛాన్స్.. ఆ ప్రాంతంలోనే.. కేంద్రం సూత్రప్రాయ అంగీకారం!

ఏపీలో మరో కొత్త ఎయిర్‌పోర్టుకు ఛాన్స్.. ఆ ప్రాంతంలోనే.. కేంద్రం సూత్రప్రాయ అంగీకారం!

ఆంధ్రప్రదేశ్‌లో మరో విమానాశ్రయం ఏర్పాటు దిశగా అడుగులు పడుతున్నాయి. అనంతపురంలో విమానాశ్రయం ఏర్పాటు చేసేందుకు కేంద్రం సూత్రప్రాయ అంగీకారం తెలిపినట్లు సమాచారం. ఆంధ్రప్రదేశ్ ఆర్థిక మంత్రి పయ్యావుల కేశవ్, అనంతపురం ఎంపీ అంబికా లక్ష్మీనారాయణ, హిందూపురం ఎంపీ బీకే పార్థసారధి చేసిన విజ్ఞప్తి మేరకు.. అనంతపురంలో పౌర విమానాశ్రయం ఏర్పాటు చేసేందుకు కేంద్ర పౌరవిమానయాన శాఖ సూత్రప్రాయంగా అంగీకారం తెలిపినట్లు తెలిసింది. కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడును గతవారం ఢిల్లీలో కలిసిన మంత్రి, ఎంపీలు.. అనంతపురంలో విమానాశ్రయం ఏర్పాటు చేయాల్సిన అవసరాన్ని వివరించినట్లు తెలిసింది.
ఈ నేపథ్యంలోనే అనంతపురంలో ఎయిర్‌పోర్టు నిర్మాణానికి సూత్రప్రాయ అంగీకారం తెలిపిన కేంద్ర పౌరవిమానయాన శాఖ మంత్రి.. ఇందుకోసం 1200 ఎకరాల భూమి అవసరమని చెప్పినట్లు తెలిసింది. ఆ మేరకు 1200 ఎకరాల భూమిని కేటాయించాల్సిందిగా రాష్ట్ర ప్రభుత్వాన్ని కోరినట్లు సమాచారం. మరోవైపు అనంతపురంలోని పుట్టపర్తిలో ఇప్పటికే ఓ విమానాశ్రయం ఉంది. అయితే పుట్టపర్తి సత్యసాయి బాబా ట్రస్టు ఆధ్వర్యంలో పుట్టపర్తి విమానాశ్రయం నడుస్తోంది. అది కూడా వీఐపీలు వచ్చేందుకు మాత్రమే పుట్టపర్తి ఎయిర్‌పోర్టును వినియోగిస్తున్నారు. దీంతో సాధారణ పౌరులకు విమానాశ్రయం అందుబాటులో లేదు. ఈ నేపథ్యంలోనే విమానాశ్రయాన్ని ఏర్పాటు చేయాలని స్థానికులు కోరుతున్నారు.
మరోవైపు ఆంధ్రప్రదేశ్‌లో ఇప్పటికే ఏడు విమానాశ్రయాలు ఉండగా.. కొత్తగా మరో ఏడు ఎయిర్‌పోర్టులు నిర్మించేందుకు ఉన్న సాధ్యాసాధ్యాలను కేంద్రం పరిశీలిస్తోంది. చిత్తూరు జిల్లాలోని కుప్పం, నెల్లూరు జిల్లాలోని దగదర్తి, పల్నాడు జిల్లాలోని నాగార్జునసాగర్, శ్రీకాకుళంలలో విమానాశ్రయాల ఏర్పాటు కోసం ఇప్పటికే కసరత్తు ప్రారంభమైంది. ఈ ప్రాంతాల్లో ఎయిర్‌పోర్టుల నిర్మాణం కోసం ఎంత మేరకు భూమి అవసరమనే వివరాలను కూడా కలెక్టర్ల నుంచి నివేదికలు అందాయి. వీటితోపాటుగా భోగాపురం విమానాశ్రయాన్ని కూడా త్వరితగతిన పూర్తి చేసి.. ఆంధ్రప్రదేశ్‌ను లాజిస్టిక్ హబ్‌గా తీర్చిదిద్దాలని ఆంధ్రప్రదేశ్ ప్రభుత్వం భావిస్తోంది. దీనికి తోడు కేంద్ర పౌరవిమానయాన శాఖ మంత్రిగా ఏపీ ఎంపీ ఉండటం కూడా కలిసి వస్తోంది.